Deputetët e të gjitha partive politike janë të painformuar dhe të “frikësuar” për mundësinë e votimit të një projektligji për themelimin e një Tribunali ndërkombëtar të drejtësisë në Kosovë.
Edhe pse ende nuk e kanë në dorë dokumentin, megjithatë përfaqësuesit e partive politike vazhdojnë ta kundërshtojnë themelimin e një Tribunali që ka për qëllim t’i gjykojë krimet e luftës së fundit në Kosovë.
Sipas tyre, lufta e UÇK-së ka qenë e drejtë dhe ka respektuar të gjitha normat ndërkombëtare, andaj kërkesa për themelimin e një tij dëmton imazhin e Kosovës.
Të zgjedhurit me votën e popullit konsiderojnë se kërkesa për këtë buron nga qarqet antishqiptare të Beogradit.
Edhe pse çështja për ngritjen e një të ashtuquajturi Tribunal ende nuk është diskutuar në Kuvendin e Kosovës, megjithatë ligjvënësit nuk janë në gjendje të deklarojnë hapur nëse do të përkrahin ligjin për themelimin e tij.
