Kryeministri i Republikës së Kosovës, Hashim Thaçi në kuadër të vizitave që po iu bën bizneseve anë e kënd Kosovës, sot ka vizituar disa ndërmarrje të prodhimit të mobileve në Vushtrri.
Kryeministri Thaçi fillimisht u ndal në Fabrikën e Mobileve “BINNI”, ku u njoftua për së afërmi me procesin e punës në këtë fabrikë moderne të përpunimit të mobileve, që është pronë e familjes Fazliu. Më pastaj Kryeministri Thaçi vizitoi ndërmarrjen për plasmanin e mobileve “DEKRA” të pronarit Xhavit Krasniqi.
Në përmbyllje të vizitës së ndërmarrjeve në Vushtrri, Kryeministri Hashim Thaçi, vizitoi Fabrikën për prodhimin e mobileve “Ciao BERTO”, të pronarit Ejup Krasniqi.
Në prononcimin për media, pas vizitave, Kryeministri Hashim Thaçi tha se Qeveria do të shikoj mundësinë që të largoj TVSH-në për lëndën e parë.
“Tash Qeveria e Kosovës do të shikojë mundësinë më të mirë dhe shpejtë që të heqë edhe TVSH-në për lëndën e parë dhe përpunimin e drurit dhe për prodhimin e mobileve, në mënyrë që të krijohen kushte dhe rrethana shumë më të lehta për përpunimin e tyre, të zgjerohen këto biznese, të hapen edhe vende të reja të punës”, tha ai.
Po ashtu, Thaçi tha se “Në kuadër të këtij angazhimi do të jetë në ndihmë edhe Fondi i Punësimit dhe Zhvillimit, që do të krijohet shumë shpejtë nga Qeveria e Republikës së Kosovës, një fond prej 1,5 miliard eurosh”.
Në emër të prodhuesve dhe të përpunuesve të drurit pronari i Fabrikës për prodhim e mobileve “Cia BERTO”, Ejup Krasniqi e falënderoi kryeministrin Thaçi për vizitën dhe për përkushtimin për zhvillimin ekonomik të vendit, duke theksuar se edhe përpunuesit e drurit dhe të mobileve, me projektet e tyre për t’u zgjeruar dhe zhvilluar dhe për të krijuar vende të reja të punës, shpresojnë të jenë përfitues nga Fondi për Punësim dhe Zhvillim.
