Arsene Wenger thotë se mungesat e shumta për shkak të lëndimeve e kanë penguar Arsenalin të luftojë për titullin e Ligës Premier.
Arsenali ka qenë pa Aaron Ramsey, që ishte shtylla e skuadrës në fazën e hershme të sezonit. Por veç uellsianit, Topçinjtë mbetën edhe pa një varg lojtarësh tjerë duke rënë kështu nga pozita e parë, në pjesën e parë të sezonit, në pozitën e pestë, disa javë më parë.
Dhe tash, pas rikthimit të tij dhe disa lojtarëve të tjerë, përfshirë Mesut Ozil, Arsenali duket se po e merr veten dhe mbrëmë shënoi fitore bindëse 3-0 ndaj Newcastle United.
“Nuk dua të marr asnjë meritë nga Aaron Ramsey, por ne kemi humbur disa lojtarë në të njëjtën periudhë dhe e gjithë kjo mendoj se do të dëmtonte shanset e shumë skuadrave”.
“Ne do të dëshironim që sezoni të ishte më i gjatë. Ne ishim në krye të ligës por humbëm shumë lojtarë në një periudhë vendimtare të sezonit”, ka thënë Wenger.
