Zëvendësministri i Jashtëm i Sri Lankës, Arun Hemachandra, tha se të paktën 80 persona u vranë pasi një nëndetëse amerikane sulmoi një anije luftarake iraniane në brigjet jugore të Sri Lankës.

Ministri i Jashtëm Vijitha Herath tha se 180 persona ndodheshin në bordin e anijes Iris Dena, një nga anijet më të reja luftarake të Iranit, kur ajo lëshoi ​​një thirrje për ndihmë në agim, rreth 25 milje në jug të portit jugor të Galle. Autoritetet e Sri Lankës kanë nisur një mision kërkim-shpëtimi për të gjetur të mbijetuar të tjerë, raporton Guardian.

Anija iraniane kishte marrë pjesë në një stërvitje detare të mbajtur në Gjirin e Bengalit nga 18 shkurti deri më 25 shkurt dhe po kthehej në Iran nga një port i Indisë Lindore kur u sulmua, raportoi agjencia e lajmeve AP. Stërvitja detare ‘Milano’ e organizuar nga India listoi një anije iraniane me emrin ‘Irins Dena’ që ka marrë pjesë në stërvitje, sipas faqes së saj të internetit.